تعريف مشروع حفظ القرءان الكريم

بسم الله
والصلاة و السلام على اشرف المرسلين
عليه افضل الصلاة و السلام

كالعادة وكلي سعادة أحبكم في الله

واستسمحكم لأنى كتبت الموضوع باللغه العاميه لأنى عايزه الفكره توصل للجميع بسهوله ولجميع الاعمار والمستويات

مش هتكلم كتير

الموضوع ببساطه أننا عايزين نشتغل ونشجع بعض على حفظ كتاب الله عز وجل.

في مواقع ومنتديات تانية كتير نجحت في الفكرة دي، وبعد فترة خرجت ناس حافظة القرآن بفضل الله ثم بفضل تشجعيهم لبعض زي ما أحنا هنعمل بالظبط إن شاء الله .

نحفظ ونشجع بعض وبنظام عشان نستمر،
بسهولة وببساطة وقوة أرادة ونية صالحة..هنحفظ كتاب الله.

الخطة ايه ؟

أستذتنا قالوا اللي عايز يبدأ في حفظ القرآن يبدأ من جزء عم، وحبذا لو مع قراءة تفسير بسيط والإلمام بقواعد القراءة الصحيحة عشان الحفظ يبقى سهل عليك.

هنحفظ قد ايه ؟
اللي ربنا يقدرك عليه
بس لو عايز تمشي معانا بنظام، أحنا هنحفظ كل يوم10 آيات .

كتير ؟
لا أبدا
10 آيات ممكن تحفظهم قبل ما تذاكر وبعد ما تذاكر وأنت راكب العربية وأنت قاعد في المترو وأنت وأنت ......وأنت أدرى مني
بس اللي شايف أنهم صعبين عليه يقول وان شاء الله هنتفق على اي حاجة تريحكم.
وعموماً 10 آيات في اليوم يعني حضرتك هتختم القرآن بعد 21 شهر تقريبا يعنى سنتين بالكتير

بس؟
آه بس
شوف حضرتك ضيعت كام سنه من عمرك..كفاية بقى .

هنسمع ؟
تسميع القرآن كتابياً مرفوض من بداية الموضوع يا جماعة..
بس طبعاً اللي يحب يسمع هيسمع .

أزاي وأنت قلت كتابياً مرفوض ؟
اللي يحب يسمع من العضوات ممكن يخلى حد من أخواته يسمعله أو صديقه ليها أو والدتها أو أى حد قريب منها ...... وإذا تعثر وجود أى حد منهم فأنا تحت أمرهم عن طريق المسنجر ممكن يبعتولى رساله خاصه و نتفق مع بعض على معاد يومى نسمع فيه

اما بالنسبه للشباب فممكن يتفقوا مع بعض على اختيار عضو منهم واذا تكرم العضو ده يسمعلهم يوميا وله الأجر و الثواب بإذن الله

طيب الدنيا حصل فيها أي ظروف وواحد فينا مبقاش يدخل؟

الحفظ مستمر..

خلي دايماً في بالك أن في ناس معاك هنا في الموضوع بيشجعوك على الحفظ، حتى لو النت انقطع عندك خالص، أحنا هنفضل معاك بردوا .

الغرض الأساسي من الموضوع هو التشجيع يا جماعة والنظام.
التشجيع يولد الإرادة والنظام يولد الاستمرارية

ها نقول الله المستعان ؟

نشوف كام واحد معانا في المشروع عشان نبدأ نرتب الأوراق وننطلق.

وعلى ما نجمع العدد اللى هيبتدى معانا هنشوف مجموعه من الروابط هتفيدنا فى مشروعنا

للتعرف على أدوات المشروع اضغط على هذا الرابط

اضغط هنا

للاطلاع على الخطه التنفيذيه للمشروع

اضغط هنا

للمشاركة وورشه العمل و المتابعه اليوميه للحفظ

اضغط هنا

وبكده أكون انتهيت من أدوات وخطه المشروع
ومنتظرين العدد الذى سيشارك معنا باذن الله
وسيبدأ الحفظ يوم الجمعه15/2/2008 ان شاء الله
ونتمنى أن يشارك الجميع معنا

نسألكم الدعاء بالاخلاص
والتوفيق للجميع